Taun Jeung Harepan Anyar...

Alhamdulillah, urang sadaya perantos lebet dina taun 1430 H anu oge disarengan ku lebetna urang kana taun 2009 M. Kumaha daramang urang Ciamis? Mugia wae sok sanaos kahirupan tambih abot karaosna, tapi rasa sukur ka Nu Maha Agung teu weleh minuhan batin urang. Apanan sukur saren sabar teh modal urang dina balawiri sapopoe milarian bekel kahirupan, sanes?
Keun wae da ari masalah mah moal teu ngaburudul aya deui aya deui, tos kitu kudratna, hayu urang payunan bari tawakal weh. Ningal kana surem tur poekna sagala jalan kahirupan di mangsa nu bakal datang mah ukur matak nimbulkeun prustasi. Padahal prustasi mah moal ngarobah kaayaan. Harga-harga tambah nerekel, gajih angger keneh wae teu naek :), bari kahayang teu weleh nambahan. Barudak sakolaeun, imah hadeaneun, halah... seueur nya hadirin? PHK dimana-mana, matak guling gasahan anu jadi pagawe kontrak. Iklim bisnis beuki beurat kaayaanana. Urang pusing ku urusan rumah tangga, derr Yahudi ngebom Gaza, duh aya ku teu nyambung nya ieu carita...
Insya Allah, da Gusti Anu Maha Welas Asih mah henteu aya kateranganana meryogikeun kulem. Hayu lah urang ihtiar bari tawekal di taun anu enggal. Gusti Allah moal cape nadah mangyuta-yuta du'a jeung harepan urang. Nu penting mah ngobahkeun awak, neang rupa-rupa jalan keur nyanghareupan sagala kabutuhan oge pakarepan urang.
Ceunah ceuk sakaol, mun urang ngalakukeun ihtiar teh ngan sarua wae unggal poena, mangka ulah ngarepkeun bakal aya beda hasilna. "If you do the same thing everyday, then you will get the same result everyday" ceuk urang kulon mah. Meuereun maksudna urang kudu neangan jalan kreatip anu liana, supaya sumur rejeki teh ulah ngan hiji, tapi bisa ngalobaan. Atawa boa-boa cara urang nimba kurang canggih, meureun kudu digentos tah ku sanyo ayeuna mah hehehe
Mun sukses, tong hilap ah urang sodakoh ka fakir miskin, tutulung kanu butuh. Insya Allah ku nembrakkeun sukur, ni'mat teh bakal nambihan teras. Amiin
Cag ah.